Alla Itolae Nusa 7

1

Eleki TUHANE Ibeteke loko Nu be, “Ale kai amu luma toinu, imi kusu kena kapale, le Au selu bei tamata rebai meije batuke ale pine ankena.

2

Bei pusue binatana rebe rilukele ete Allare yele, suke akusue bei papelakelu, nelia itu kai inai itu. Po bei binatana rebe rilukele ete Allare saisa more, akusue neli esa kai inai esa.

3

Kai bei manuaru, arana bei papelakelu tulala itu kai inai itu. Leke punulu bei nusa meije yake.

4

Le petua itu suike Au ono ulane tetu kena nusa meije petua butu ata, kpita kpetu ehleke moneka. Leke Au punu pusue tanei kwanala rebe Au tolaelu mei nusare.”

5

Eleki Nuh iono lulu pusue rebe TUHANE Ipletaeni lokole.

6

Kena kwele lolo nusare, Nu eni musuna utuna ne.

7

Nu kai eni bina, eni nanaru kai esi binaru esi kusu kena kapale, leke esi molo kena kwele yake.

8

Eleki bei binatana rebe riluke ete Allare yele, kai rebe riluke ete Allare saisa more kai manuaru kai binatana rebe umesare,

9

uluake inai lulua, neli kai inai, tulale bata, ukusu lopai lale loko Nu lulu Alla Ibeteke eteije.

10

Eleki petua iture lia, ulane tetu eti kwele lolo nusa.

11

Kena Nu eni musuna utuna ne, kena bulane lua musune mere, kena petua butu esa lesini itu bulane mere, petu mere kwele boboke papela otoi ktili titinai kai lanite baeke papela otoi.

12

Eleki ulane elake etetu pusue nusa kpita kpetu, petua butu ata.

13

Kena petu mere neka Nu kai eni bina, eni nanae Seme, Yapeta kai Hame kai esi binaru esi kusu lopai kapal lalei.

14

Kai pusue binatana rebe pialaelu more kai rebe pialaule, kai pusue binatana rebe umesare kai pusue manue rebe esi bului kai balakibite ukusu lekwe.

15

Hoko pusue yelu rebe esi nasite uluake inai lulua, neli kai inai, tulale kai bata papelakelu, ukusu loko Nu mpai kapale laleije.

16

Rebe ukusu mere neli kai inai, tulale kai bata papelakelu lulu Alla Eni pleta ete Nure. Kena pusue ukusu peneka, eleki TUHANE Ikobue kapale esi meture ne.

17

Kwele lolo nusare petua butu ata, kwele sa nanu titinai eleki ebitike kapale mere, eti ere biti ndete kwele babaije.

18

Kwele sa rame, hoko kapale ere biti ndete kwele babai.

19

Kai kwele tapa rame eti kwele esa lia pusue ulata mei nusare,

20

metera itu hoko elolo pusue ulataru.

21

Hoko TUHANE Ipunu pusue taneia kwanale: tamata, manue kai binatana nda kmalane tone elake. Rebe mata more Nu kai eni bina, eni nanaru kai esi binaru kai pusue rebe usakesa kaini me kapale laleije.

22

[tolong lihat ayat sebelumnya]

23

[tolong lihat ayat sebelumnya]

24

Kwele lolo nusare petua utune esa lesi butu lima.

alkitab.me